Padayon an manhunt operation han mga otoridad kontra ha tulo nga Persons Deprived of Liberty (PDL) nga nakaeskapo han aga han Martes, Hulyo 1, tikang ha Northern Samar Provincial Jail (NSPJ) ha Brgy. Dancalan, Bobon.
Sumala ha kapulisan, ginkilala an mga nakaeskapo nga amo hira Sonny Acodesin Montaño, 31 anyos, tikang ha UEP Zone 1, Catarman, Northern Samar, ngan may kaso nga Murder ngan Frustrated Murder; Marlon Marril Unay, 28 anyos, single, tikang ha Brgy. Roxas, Mondragon, Northern Samar ngan may kaso nga Murder; ngan Eldefonso Ribay Jagonoy, 58 anyos, single, tikang ha Mondragon, Northern Samar ngan may kaso nga Rape in relation to R.A. 7610 (Child Abuse Law).
Ginpapadayon yana han kapulisan, Bureau of Jail Management and Penology (BJMP), ngan iba pa nga ahensya an koordinado nga operasyon para ha madagmit nga pagkadakop han tulo nga pugante.
May mga checkpoints na liwat nga gin-establisar ha mga strategic nga lugar ha Northern Samar ngan nearby areas.
Nagpahinumdom an mga otoridad ha publiko nga magin alerto ngan dayon magsumat ha sapit nga police station kun may makikit-an nga may nahibabaroan nga impormasyon ha presensya han mga pugante.
Padayon an imbestigasyon kun paonan-o hira nakagawas ha pasilidad, samtang ginrirepaso an seguridad han jail compound.
#WeTakeAStand #OpinYon #OpinYonNews