Ginkuhà han University Security Force (USF) an banner han student publication nga The Pillar nga may mensahe nga “Junk HB 9414, 9861” ngan “Defend Press Freedom” ha University of Eastern Philippines (UEP) ha Catarman, Northern Samar, han Huwebes, Setyembre 17.
Ginkuha an banner tikang ha ikatulo nga andana han Academic Circular Building samtang ginpapadayon an Balik Kampus UEPic 2026: Lush Life.
Nagkaada hin komprontasyon ha hagdanan han building han pakianhan han University Student Council (USC) President Jamismark Perante, Vice President for External Affairs Klitz Anaviso, ngan mga miyembro han The Pillar an USF mahitungod han pagtanggal han banner.
Ginsiring ni USF leader Kim D. Marquita ha mga estudyante, “Ask your Adviser,” han pakianhan hiya kon kay ano nga ginkuha an banner.
Ha urhi, nakatawag hi Marquita kan Office of Student Affairs (OSA) Dean Arnold Rapsing, nga ginsiring nga naghangyo nga igpagawas an banner samtang nagtitikadamo an mga estudyante nga nagkatirok ha lugar.
Ha butnga han komprontasyon, ginsiring nga haros mahiduso han usa nga security personnel an usa nga miyembro han student publication, nga haros mahulog ha hagdanan.
Nagpahayag hin suporta ha press freedom ngan artistic liberty an mga estudyante ngan mga representante han iba-iba nga student organizations nga nagkatirok ha lugar.
Ginpahayag ni USC President Perante nga diri husto an pagtanggal han banner ngan iya ginpabug-atan an katungod han mga estudyante ha pagpahayag han ira panlantaw.
Samtang, an The Pillar nagpahayag hin kabaraka mahitungod han artistic expression ngan press freedom ha sulod han unibersidad.
An banner ginpakita komo bahin han afternoon session han Balik Kampus UEPic 2026 ngan nagtutuyo hin panawagan kontra ha House Bills No. 9414 ngan 9861.
Tubtob ha pagkayana, waray pa magpagawas hin opisyal nga pahayag an UEP administration mahitungod han espesipiko nga rason han pagtanggal han banner.
An insidente nahitabo samtang padayon an deliberasyon han nasabi nga mga panukala ha House of Representatives.
#OpinYon8News #WeTakeaStand #UEP