Nagdugang an Local Government Unit (LGU) han Balangkayan, Eastern Samar hin duha nga bag-o nga multicab nga gagamiton ha paghatag hin libre nga transportasyon para ha mga estudyante ha bungto.
Ini nga programa ginpapakusog pinaagi han inisyatiba ni Mayor Allan Contado ngan Vice Mayor Edith Anne Contado, sugad nga bahin han padayon nga paningkamot han LGU ha paghatag hin mas accessible ngan mas komportable nga transportasyon para ha mga estudyante.
An usa han duha nga bag-o nga multicab in gagamiton ha paghatod ngan pagsundo han mga estudyante tikang ha Barangay Balogo, nga usa han mga barangay nga may damo nga mga estudyante.
An ikaduha naman nga multicab magsiserbisyo ha mga estudyante tikang ha Barangay Cantubi, Bangon, Caisawan, Julag, ngan Guinpoliran.
Pinaagi han pagdugang hini nga duha nga sarakyan, upat na ngatanan an multicab o service vehicles han LGU nga nakatalaga ha paghatag hin libre nga sakay para ha mga estudyante.
Ginkikinita liwat nga magdudugang pa an LGU hin duha nga multicab ha masunod nga tuig basi mahaluag pa an serbisyo, maserbisyuhan an mas damu nga estudyante, ngan matagan hira hin mas komportable ngan mas maupay nga pagbiyahe kada adlaw.
Kabahin ini han padayon nga paningkamot han LGU Balangkayan ha pagsuporta ha edukasyon ngan ha pagseguro nga an mga estudyante ha tagsa nga barangay may mas maupay nga oportunidad nga makaeskwela nga diri nababaraka ha gasto han adlaw-adlaw nga pamasahe.
(Van Basilia)
#Opinyon8News #WeTakeAStand