Iginduso ni Borongan City Mayor Jose Ivan Dayan Agda an pagtukod hin hydroelectric power sources ha syudad basi mapahabubo an sukot han kuryente para ha mga konsumidor.
Iginpahayag ini ni Agda ha iya mensahe ha 44th Annual General Membership Assembly (AGMA) han Eastern Samar Electric Cooperative (ESAMELCO) dida han Agosto 29.
Sumala kan Agda, may dako nga potensyal an Borongan tungod han iya masagana nga mga salog o river system, nga puyde magin tinikangan hin dugang ngan mas barato nga suplay hin enerhiya. Kon matutuman an proyekto, posible liwat nga magpahabubo ini han gasto han kooperatiba ha pagpalit hin kuryente.
Gindayaw liwat han alkalde an ESAMELCO, ha pangunguna ni General Manager Atty. Jose Michael Edwin Amancio, tungod han madagmit nga pagresponde han mga linemen ha mga problema ha koneksyon ngan suplay hin kuryente.
Iginpahayag liwat ni Agda an iya pag-apresyar ha padayon nga kolaborasyon han City Government of Borongan ngan ESAMELCO para ha mas maopay nga serbisyo ha mga residente.
Mahinunumdoman nga ha syahan nga termino ni Agda, nakabulig an lokal nga gobyerno ha paghatag hin mga kuntador para ha haros 1,000 nga panimalay basi makakonektar hira ha suplay hin kuryente.
An AGMA in tinuig nga aktibidad han ESAMELCO ngan han National Electrification Administration (NEA) para ipahibaro ha mga konsumidor an kahimtang ngan mga programa han kooperatiba.
(Van Basilia/OpinYon 8 News Team)
#Opinyon8News #Borongan