Ginpapa-usisa han mga awtoridad an usa nga mensahe nga may gin-aallegar nga plano hin pagpamusil ha mga eskuylahan ha Eastern Samar.
Ha usa nga panawagan nga igin-post ha publiko, ginaaghat an Philippine National Police (PNP), National Bureau of Investigation (NBI), Anti-Cybercrime Group ha Region 8, ngan mga police station ha Eastern Samar nga buligan ha pag-ila ngan pag-locate han tawo nga ginsisiring nga nagpadara han mensahe.
Gin-sisiring ha nasabi nga mensahe an Lalawigan National High School ngan Llorente National High School sugad nga posible nga target.
Tungod han seryoso nga sulod han mensahe, gin-aaghat an mga awtoridad nga maghimo hin dayon nga verification ngan cybercrime investigation basi matudlok kon tinuod ngan kredible an gin-aallegar nga hulga.
Ginpapanawagan liwat an koordinasyon han Cybercrime Investigation and Coordinating Center (CICC) ha pag-usisa han online nga mensahe ngan pag-trace han posible nga nagpadara hini.
Samtang waray pa opisyal nga kumpirmasyon tikang ha mga awtoridad mahitungod han kredibilidad han hulga, gin-aaghat an publiko nga magin mabinantayon ngan likyan an pagpakalat hin diri pa napapamatud-an nga impormasyon.
An bisan hin-o nga nakakarawat hin nasabi nga mensahe o may impormasyon nga makakabulig ha pag-ila han nagpapadara hini gin-aaghat nga magreport dayon ha PNP, NBI, o ha pinakahirani nga police station.
(Van Basilia/OpinYon 8 News Team)