Nadakop han mga awtoridad an usa nga 22-anyos nga estudyante ha ginpatuman nga buy-bust operation ha Barangay Payao, Catbalogan City, Samar, han Agosto 26.
Sumala ha PDEA Regional Office VIII–Samar Provincial Office, ginpatuman an operasyon kaupod an Samar Police Provincial Office Provincial Drug Enforcement Unit (SPPO-PDEU) alas-4:41 han kulop, nga nagresulta ha pagkadakop han suspek nga ginkilala ha alyas nga “KL.”
An suspek residente han Barangay Canlapwas, Catbalogan City, ngan nag-aaram ha kurso nga Bachelor of Science in Industrial Security Management ha Catbalogan City Community College.
Ha operasyon, narekober tikang ha possession han suspek an 14.85 gramos nga ginkukonsiderar nga marijuana. May tinatagna ini nga street value nga ₱3,712.50 ngan standard value nga ₱1,782.50.
Nakuha liwat han mga operatiba an marked money nga gin-gamit ha operasyon, mga packaging materials, ngan school ID han suspek.
Ha inisyal nga impormasyon, ginsiring han suspek nga kinahanglanon niya an kwarta tikang ha ilegal nga aktibidad basi suportahan an iya pag-eskwela ngan an iya 79-anyos nga lola nga iya kaupod ha balay.
Ginpahayag liwat niya nga bulag na an iya mga kag-anak. An iya nanay aadto ha abroad, samtang an iya tatay naukoy ha Tacloban ngan may kalugaringon na nga pamilya.
Ginpapasakaan an suspek hin kaso tungod han pagtalapas ha Section 5, Sale of Dangerous Drugs, ngan Section 11, Possession of Dangerous Drugs, han Article II han Republic Act No. 9165 o Comprehensive Dangerous Drugs Act of 2002.
Yana, nakadetine an suspek ha PDEA Samar Detention Facility samtang ginhihimo an kaangayan nga legal nga proseso.
(Van Basilia/OpinYon 8 News Team)
#OpinYon8News #PDEA #SamarNews