May bag-o nga oportunidad para ha mas marig-on nga suplay hin kuryente ha Eastern Samar matapos magbisita an Challengery Japan ha opisina ni Governor Ralph Vincent Evardone.
Ha ira courtesy call, ginpresentar ni CEO Atsushi Shimizu an teknolohiya han ira vertical-axis wind turbines nga mahimo gamiton sugad backup power labi na ha panahon hin kalamidad.
An kompanya, nga nakabase ha Tokyo, ginpundar katapos han 2011 tsunami ha Japan, ngan yana kilala ha paghimo hin portable ngan disaster-resilient nga mga wind turbine.
Sumala kan Shimizu, may-ada na 21 nga turbines nga aktibo nga ginagamit ha Japan, nga nagpapakita han kapasidad hini nga teknolohiya ha paghatag hin alternatibo nga enerhiya.
Gintagan hin konsiderasyon nga pagbutangan han proyekto an mga bungto han Dolores, Can-avid, Taft, ngan an syudad han Borongan, lakip an mga barangay han Bugas, Maypangdan, ngan Sabang South.
Ginhangyo liwat ni Gov. Evardone nga isakob ha plano an mga isla sugad han Suluan ngan Hilabaan nga limitado an access ha kuryente ngan nagsasarig la ha generator ngan solar panels.
Base ha timeline, target nga mahuman an site selection ha Hunyo ngan masunod an mobilization ha Hulyo.
Gintutuyo nga ipatuman an proyekto tikang 2026 tubtob 2028, ngan igdodonate ini nga mga turbine ha probinsya waray bayad.
Ginpasalamatan ni Gov. Evardone an inisyatiba, nga iya ginhulagway nga dako nga bulig ha pagpadig-on han disaster preparedness ngan enerhiya ha probinsya.
#WeTakeAStand #OpinYon #OpinYonNews