Nagpagawas an Municipality of Taft, Eastern Samar hin Executive Order No. GAT-019, Series of 2026 nga nagduduso hin cost-cutting, austerity, ngan energy efficiency measures labi na ha pagselebrar han patron.
Sumala han order nga pirmado ni Taft Mayor Gina Alzate-Ty, ginlimitahan na ngadto ha usa ka adlaw la an fiesta celebration ha ngatanan nga barangay basi malikyan an sobra nga paggasto ngan mapreserbar an pondo para ha esensyal nga serbisyo publiko.
Ginbabawal na liwat an dagko nga sosyo-kultural ngan entertainment activities sugad han concerts, beauty pageants, sports events, ngan iba pa nga magrerequire hin dako nga pondo ngan enerhiya.
Ginpabug-atan han LGU nga diri ini pag-undang han tradisyon, kundi pagparig-on han disiplina ngan responsable nga paggamit han rekurso, samtang ginpuprotektahan an kultura ngan pagtoo han komunidad bisan ha panahon hin krisis.
(Van Basilia)
#WeTakeAStand #OpinYon #OpinYonNews