Usa nga sunog an nahitabo kakulop han kulop, Mayo 21, ha dukot-dukot nga kabablayan ha Purok 6, Barangay Dagum, Calbayog City.
Sumala ha mga residente ngan mga saksi ha insidente, nagtikang an kalayo bandang alas-5:00 han kulop ngan madagmit nga nagdako tungod han pagkadukot-dukot han mga kabalayan ha lugar.
Nagkawsa ini hin kahadlok ha mga residente samtang nangangalagiw an iba para malikyan an peligro.
Dayon naman nga rumesponde an mga personnel han Bureau of Fire Protection (BFP) upod an iba pa nga responder agud mapugngan an pagsarang han kalayo ngadto ha mga hirani nga balay.
Kataliwan hin haros 30 minutos nga pagresponde ngan pakigbisog kontra han sunog, ginpahayag han BFP nga “fire out” na an insidente bandang alas-5:30 han kulop.
Tubtob yana, waray pa opisyal nga pahayag an mga otoridad mahitungod han gintikangan han sunog samtang padayon pa an ira imbestigasyon.
Waray pa liwat opisyal nga report mahitungod han kabug-usan nga danyos ngan posible nga mga naapektuhan han insidente.
(OpinYon 8 News Team)
#WeTakeAStand #OpinYon #OpinYonNews #FireIncident