Nagkaurusa an mga lider han tulo nga probinsya han Samar ha pagpadayon han kampanya nga matagan hin UNESCO World Heritage Site nga pagkilala an Samar Island Natural Park (SINP), kasunod han ira coordination meeting kaupod an Department of Environment and Natural Resources (DENR) Secretary Juan Miguel "Mitch" Cuna han Hulyo 16.
Lakip han nagtambong ha miting hira House Minority Leader ngan 4Ps Party-list Representative Marcelino "Nonoy" Libanan, Eastern Samar Lone District Representative Sheen Gonzales, Samar Governor Sharee Ann Tan, Samar First District Representative Jimboy Tan, Samar Second District Representative Michael Tan, ngan Provincial Administrator Nelson Cortez nga nagrepresentar kan Eastern Samar Governor Ralph Vincent "RV" Evardone.
Ginpahayag han mga opisyal nga importante an marig-on nga pagbinobligay han nasyonal nga gobyerno, mga lokal nga pamunuan, ngan iba pa nga sektor basi matuman an mga kinahanglanon han UNESCO para ha nominasyon han parke.
An Samar Island Natural Park, nga nasasakop ha Samar, Northern Samar, ngan Eastern Samar, usa han pinakadako nga protected forests ha nasud. Kilala ini tungod han iya mayaman nga kalibungan, dagko nga mga lungib, salog, ngan mga talagsahon nga tanom ngan hayop nga diri makita ha iba nga lugar.
Sumala kan Rep. Libanan, an pagkilala han UNESCO magigin dako nga kadungganan para ha Samar Island, Eastern Visayas, ngan bug-os nga Pilipinas.
Dugang pa nira Libanan ngan Gonzales, an maabot nga pagkilala makakabulig ha pagpakusog han konserbasyon han parke samtang ginpapauswag an responsable ngan sustenable nga turismo.
Nagpahayag liwat hin pagsarig an mga lider nga pinaagi han padayon nga koordinasyon ngan kooperasyon han ngatanan nga sektor, may higayon an Samar Island Natural Park nga mahibulig ha prestihiyoso nga UNESCO World Heritage List.
#WeTakeAStand #OpinYon #OpinYonNews