Gin-abiabi han mga opisyal han probinsya han Eastern Samar, Diocese of Borongan, ngan City Government of Borongan an Apostolic Nuncio ha Pilipinas nga hi Archbishop Charles John Brown dida han Hunyo 4.
Gintikangan an iya pagbisita pinaagi hin civic reception ha Loom Bridge diin nagtambong an mga lokal nga lider, kapadian, ngan mga miyembro han Simbahan Katolika basi tagan hiya hin mapaso nga pagkarawat.
Sunod hini, binisita hi Archbishop Brown ha Borongan Cathedral para han usa nga halipot nga programa ngan bendisyon.
Sugad nga timaan hin pagpasalamat ngan pagrespeto, iginhatag han Provincial Government of Eastern Samar an usa nga miniature replica han bantogan nga Balangiga Bells.
An Apostolic Nuncio in nagbisita ha syudad basi manguna ha bendisyon ngan opisyal nga pagbukas han bag-o nga priests’ home han Diocese of Borongan nga nahimumutang ha Sitio Balatic, Oikos Village, Brgy. Balud 2.
An pasilidad magigin puluy-an ngan sentro han pag-ataman han mga lagas nga kaparian han diyosesis.
An nasabi nga pagbisita nagin usa nga makabulig nga higayon para mapadig-on an pag-urusa han Simbahan ngan han lokal nga gobyerno para ha kauswagan han komunidad.
(Van Basilia)
#WeTakeAStand #OpinYon #OpinYonNews