Ginsuspinde han administrasyon han San Jose National High School (SJNHS) ha Tacloban City an ngatanan nga klase yana nga Martes, Hulyo 14, katapos makakarawat hin online nga mensahe nga naglalakip hin panarhog hin pagpamusil ha sulod han eskwelahan.
Ha opisyal nga pahayag nga iginpagawas han eskwelahan pinaagi han Facebook page hini, iginsumat nga an mensahe iginsend pinaagi han Messenger han usa nga account nga nagpakilala nga "JM Magallanes," nga nagsiring nga hiya in sangkay kuno ni Nash.
Ha nasabi nga mensahe, igintarhog nga may napulo nga katawo an makadto ha eskwelahan agud magbuhat hin pagpamusil. Ginsiring liwat nga an target amo an mga estudyante ha Grade 7 ngan Grade 8, samtang may pipira nga espesipiko nga ngaran nga gin-unabi.
Tungod han posible nga peligro, dayon nga ginsuspinde han administrasyon an klase agud mapanalipdan an mga estudyante, magturutdo, ngan iba pa nga empleyado han eskwelahan. Nagpakusog liwat hira han koordinasyon ha kapulisan ngan iba pa nga mga otoridad para ha angayan nga seguridad ngan imbestigasyon.
An bag-o nga online threat nagdara utro hin kabaraka ha komunidad han eskwelahan, labi na kay an San Jose National High School amo gihapon an lugar diin nahitabo an madugo nga insidente han Hunyo 22, 2026, nga nagresulta ha pagkamatay han tulo nga estudyante ngan pagkasamad han iba pa.
Samtang, padayon pa an imbestigasyon han mga otoridad agud maberipika an kamatuoran han panarhog ngan mahibaroan an responsable hini.
Ginhahangyo liwat an publiko nga magpabilin nga kalmado ngan magsarig la ha mga opisyal nga impormasyon nga iginpapagawas han mga awtoridad.
#WeTakeAStand #OpinYon #OpinYonNews