Narekober han mga awtoridad an ginbabanabana 10.51 gramos han gin-aalegar nga shabu nga may standard drug price nga P68,296 samtang tulo nga indibidwal an nadakop ha usa nga pinagsanib nga buy-bust operation nga nagresulta han pagbungkag han usa nga gin-aallegar nga drug den ha Brgy. 13, Catbalogan City han Mayo 28.
An operasyon ginpatuman han Philippine Drug Enforcement Agency Regional Office 8 (PDEA RO8) Samar Provincial Office upod an Catbalogan City Police Station–Station Drug Enforcement Team alas-3:30 han kulop.
Ginkilala an mga nadakop nga hira alyas “Boning,” 22 anyos, nga gin-aallegar nga maintainer han drug den; “Nina,” 52 anyos, nga gin-aallegar nga empleyado; ngan “Paulo,” 36 anyos, nga gin-aallegar nga bisita han lugar.
Labot han mga gin-aalegar nga iligal nga droga, nakuha liwat han mga operatiba an usa nga sachet han gin-aalegar nga shabu nga ginbaligya ha poseur-buyer nga nagkakantidad hin Php500, unom pa nga sachet han gin-aalegar nga shabu, buy-bust money, usa nga cellphone, mga drug paraphernalia, ngan magkadiro-dilain nga sensilyo.
Sunala han PDEA, maatubang ha kaso an mga suspek tungod han gin-aallegar nga paglapas han Sections 5, 6, 7, 11, 12 ngan 15 han Article II han Republic Act 9165 o Comprehensive Dangerous Drugs Act of 2002.
Utro nga ginpabug-atan han PDEA RO8 an ira determinasyon nga padayon nga pakusgon an kampanya kontra iligal nga droga ngan mapabilin nga talwas ngan waray droga an mga komunidad ha bug-os nga Eastern Visayas.
(Van Basilia)
#WeTakeAStand #OpinYon #OpinYonNews