Posible nga "love triangle" o selos an motibo han pamusíl nga nagresulta han kamatay han usa nga 25-anyos nga lalaki ha Brgy. 3, Maydolong, Eastern Samar, Hunyo 7.
Sumala kan Eastern Samar Provincial Police Office (ESPPO) Provincial Director PCol. Ernesto Macasil, ini an lumabas ha inisyal nga pahayag han partner han biktima nga ginkilala nga hi Andrein Iñego.
An biktima, nga bag-o la umabot tikang ha Manila para magbakasyon ha Maydolong, ginpusil han mga suspetsado pasado alas-1:40 han kulop.
Madagmit nga nakigburublig an mga residente pinaagi han paghatag han plaka han sarakyan nga ginamit han mga suspek.
Tungod hini, nasundan han kapulisan an ira ruta ngan napwersa hira pag-abandonar han ira sarakyan ha Balangkayan antes sumakay hin de-pasahero nga van.
Pinaagi han flash alarm ngan koordinasyon han mga otoridad, nadakpan an duha nga suspetsado ha magkasunod nga operasyon ha San Juanico Checkpoint samtang naniningkamot pag-ikyas tikang ha rehiyon.
Samtang ginpapadayon pa an imbestigasyon, gin-aandam na han kapulisan an pormal nga pagsasaka han kaso kontra ha mga nadakop. Ginkonsiderar naman han ESPPO nga "solved" na an kaso tungod han pagkaaresto han mga gintutudlok nga suspek.
#WeTakeAStand #OpinYon #OpinYonNews