Gin-welcome han Municipal Government of Balangkayan hi House Minority Leader ngan 4Ps Partylist Representative Cong. Marcelino “Nonoy” C. Libanan ha iya pagbisita ha bungto basi personal nga makita ngan masabtan an mga panginahanglan ngan prayoridad nga proyekto han lokal nga gobyerno.
Personal nga gin-inspeksyon ni Libanan an Balangkayan Seawall, nga usa han mga prayoridad nga proyekto nga iginpresentar ni Mayor Allan Contado para han posible nga funding support.
Lakip liwat ha mga proyekto nga iginpresentar han alkalde an pagkumpleto han mga road networks ngan Farm-to-Market Roads (FMRs), nga gintutuyo nga mapauswag an transportasyon ngan konektibidad han mga barangay ngan mga komunidad.
Iginpresentar liwat ni Contado an reconstruction han New Municipal Building, nga ginkilala nga usa han importante nga panginahanglan han munisipyo. Nagpahayag naman hi Congressman Libanan hin iya suporta ha mga nasabi nga proyekto.
An pagbisita ni Libanan naghatag hin higayon basi personal niya makita an kahimtang han mga prayoridad nga proyekto ngan mabatian an mga panginahanglan han lokal nga gobyerno.
Nagpasalamat an Municipal Government of Balangkayan kan Congressman Libanan tungod han iya panahon, suporta, ngan padayon nga pagtagad ha mga panginahanglan han mga Balangkayanon.
“Dako nga salamat, Congressman Nonoy Libanan, han imo panahon, suporta, ngan padayon nga pagtagad ha panginahanglan han mga Balangkayanon.”
#WeTakeAStand #OpinYon #OpinYonNews