Wasak ang harapan ng isang bahay at sari-sari store matapos banggain ng isang truck nitong madaling-araw ng Linggo, November 24.
Ayon sa salaysay ng may-ari ng bahay na kinilala bilang si alyas "Pearson," natutulog silang mag-anak sa loob ng kanilang bahay sa kahabaan ng National Highway, Barangay Banaybanay bandang ala-una ng madaling-araw ng Linggo nang magising sila ng isang malakas na kalabog mula sa labas.
Nang lumabas siya upang magsiyasat ay doon niya nakita ang isang truck na minamaneho ng isang pinangalanang "Arturo" na bumangga na pala sa harap ng kanilang bahay.
Bukod sa pinsala sa bahay at tindahan ng biktima ay nasira rin ang likurang bahagi ng kanyang kotse.
Maswerte namang walang nasugatan sa nasabing insidente.
Sa pahayag naman ni "Arturo," binabagtas niya ang kahabaan ng National Highway papunta sa direksyon ng Calamba City nang tinangka niyang umiwas sa dalawang motorsiklo na biglang huminto sa harap niya.
Dito na umano siya nawalan ng kontrol, dahilan upang bumangga ang truck niya sa bahay.
Nang dalhin naman sa ospital ang driver ng truck ay nagpositibo siya sa alak.
Nakadetine na si "Arturo" sa Cabuyao City police station habang inihahanda ang mga kasong isasampa laban sa kanya.
#WeTakeAStand #OpinYon #OpinYonNews