Isang binatilyo ang sugatan matapos barilin ng kanyang kapitbahay nang sawayin ng kanyang tatay ang aso nito sa Siniloan, Laguna nitong nakaraang Miyerkules, February 26.
Nagpapagaling na sa General Cailles Memorial Hospital sa Pakil ang biktima na kinilalang si alyas "Ben," 15 anyos at residente ng Barangay Halayhayin, Siniloan, Laguna.
Sa ulat ng Siniloan Municipal Police Station, naglalakad umano pauwi sa kanilang bahay si "Ben" kasama ang kanyang mga magulang bandang alas-diyes ng gabi ng Miyerkules nang makasalubong nila ang aso ng kapitbahay nila na kinilala lamang sa alyas na "Dondon."
Nang tangkaing kagatin ng aso ang binata ay kumuha ng isang bato ang tatay niya at ipinukol sa hayop.
Nagkataon namang nakita ng suspek ang pagbato ng tatay ng binata sa aso, dahilan upang bumunot ito ng baril at pagbabarilin ang biktima na tinamaan sa kanang bahagi ng kanyang katawan.
Pinaghahanap na ng mga awtoridad si "Dondon" na kaagad tumakas matapos ang krimen.
#WeTakeAStand #OpinYon #OpinYonNews