Nagin una nga unibersidad ha bug-os nga Visayas an Eastern Samar State University (ESSU) nga nakig-partner ha Bixter Academy para han usa nga international paid internship program nga magbubulig labi na ha mga estudyante ha agrikultura ngan iba pa nga kaupod nga kurso.
Pormal nga ginpirmahan an Memorandum of Agreement (MOA) nira Bixter Academy CEO Nataliya Jorgensen ngan ESSU President Dr. Andres Pagatpatan, nga may suporta han probinsyal nga gobyerno ha panguna ni Gov. RV Evardone.
An nasabi nga inisyatiba nagsugod pa han 2025 pinaagi han paningkamot han probinsyal nga gobyerno ha pamunoan han anay gobernador Ben P. Evardone, upod an bulig ni Glenda Dulfo han Bureau of Immigration, nga taga-Borongan City.
Ginpahayag ni Gov. Evardone nga an pagpahaluag han oportunidad para ha mga Estehanon amo an iya padayon nga adbokasiya.
Iya ginpabug-atan nga an programa magbubukas hin global nga oportunidad para ha kabataan basi magtubo an ira kahibaro, makabulig ha ira pamilya, ngan maghatag dungog ha Eastern Samar.
Nagpasalamat liwat an gobernador han Bixter Academy tungod han pagsarig ngan pag-invest ha kapasidad han mga batan-on nga Estehanon.
Ginalaoman nga an partnership magpapakusog han international exposure ngan career opportunities han mga estudyante ngan alumni han ESSU, samtang ginpapauswag an sektor han edukasyon ngan workforce development ha probinsya.
Natapos an aktibidad pinaagi hin open forum kun diin naghatag hin mga pakiana ngan kabaraka an mga estudyante may kalabutan han international internship, nga ginbaton naman han mga representante han Bixter Academy.
#WeTakeAStand #OpinYon #OpinYonNews