Usa nga dako nga pitad para ha sektor han edukasyon ngan healthcare ha Eastern Samar an opisyal nga pag-inaugurar han Eastern Samar State University (ESSU) han ira College of Medicine, upod han pag-unveil han opisyal nga logo hini, ha ginbuhat nga seremonya ha ESSU Main Campus, Huwebes, Hulyo 2.
An mahinungdanon nga okasyon gintagad sugad nga katuparan han maiha na nga hingyap nga makahatag hin oportunidad ha mga aspirante nga Estehanon nga magin doktor nga diri na kinahanglan bumalhin ha iba nga rehiyon.
Ha iya mensahe, nagpasabot an probinsyal nga gobyerno ha panguna ni Gov. RV Evardone han suporta pinaagi han pag-sponsor hin 10 nga iskolar kada tuig para ha College of Medicine, agud masiguro nga an mga deserving nga estudyante makakaeskwela bisan pa han kakurian ha pinansyal.
Dugang pa hini, gin-anunsyo ni Gov. Evardone an P500 milyon nga pondo para ha rehabilitasyon han Eastern Samar Provincial Hospital (ESPH), nga magagamit para ha pag-upgrade han mga pasilidad ngan pagpauswag han hands-on clinical training para han mga medical students.
Durante han seremonya, ginbuhat an ceremonial enrollment para ha 11 nga pioneering medical students nga magigin kauna-unahan nga batch han nasabi nga kolehiyo.
Gindayaw an okasyon han mga nanguna nga opisyal sugad kanda House Minority Leader Marcelino Libanan, ESSU President Andres Pagatpatan Jr., mga representante han Commission on Higher Education (CHED) ngan Tingog Partylist, Board Member Atty. PJ Evardone, mga alkalde ha iba-iba nga bungto, ngan mga bag-o nga faculty ngan staff han medikal nga eskwelahan.
An pagtukod han College of Medicine ginkikita nga dako nga paglaum para ha mas maupay nga sistema hin panglawas ha Eastern Samar, ngan para ha mas madig-on nga healthcare workforce ha masunod nga mga tuig.
#WeTakeAStand #OpinYon #OpinYonNews