Nagkaada hin dako nga kadaugan para ha sektor han turismo han Eastern Samar matapos mapili hi Provincial Tourism Officer Neil Alejandro Pinarok sugad nga presidente han Eastern Visayas Tourism Officers Association (EVTOA).
An pagkapili kan Pinarok nagpapamatuod han padayon nga pagkilala ha mga inisyatibo han probinsya ha pagpasamwak ngan pagpauswag han turismo.
Kilala an Eastern Samar tungod han mga programa sugad han Dayaw Tours ngan Dasig Tours nga nagbubulig ha pagpromote han mga destinasyon ngan atraksyon ha iba-iba nga bungto han probinsya.
Sumala han asosasyon, ginlalaoman nga an bag-o nga liderato magpapakusog han pagburubligay han mga tourism officer ha bug-os nga Eastern Visayas para mas mapauswag an turismo, ekonomiya, ngan lokal nga kultura ha kada probinsya ngan bungto.
Labot kan Pinarok, napili liwat an iba nga mga opisyal nga mabulig ha pagdumara han EVTOA, nga nagrerepresentar han mga probinsya ngan syudad ha rehiyon.
An pagkapili han Eastern Samar tourism chief sugad nga presidente han EVTOA ginkikita nga usa nga higayon para mas mapadukwag an regional tourism development ngan mapadayon an promosyon han Eastern Visayas sugad nga usa nga importante nga destinasyon turistiko ha nasud.
(Van Basilia)
#WeTakeAStand #OpinYon #OpinYonNews