Nagparig-on an Provincial Disaster Risk Reduction and Management Council (PDRRMC) han Eastern Samar han ira mga preparasyon kontra han posible nga pag-abot han El Niño pinaagi han ikaduha nga quarter meeting nga ginbuhat dida han Hunyo 9 ha Capitol Site, Borongan City.
Ha miting, ginpresentar han DOST-PAGASA nga aada yana ha El Niño alert status an nasud, ngan posible nga magtikang an El Niño ha masunod nga mga bulan samtang nagpapadayon an paghataas han posibilidad han mapaso ngan mamara nga panahon.
Gintagan importansya han iba-iba nga ahensya an kahimtang han suplay han tubig, kahimsog publiko, agrikultura, kalamragan, ngan katalwasan han komunidad.
Gin-aghat liwat an mga residente nga magtipid han paggamit han tubig ngan magbantay kontra mga sakit nga kasagaran nagtitikadamo durante han panahon han taghuraw.
Sumala han Office of the Provincial Agricultural Services, padayon an mga preparasyon para maproteheran an sektor han agrikultura samtang an Provincial Veterinary Office naglatag hin mga pitad para malikyan an negatibo nga epekto han El Niño ha mga ataman nga hayop.
Nagpahayag liwat an Philippine National Police nga nagtukod na hira hin monitoring teams para masiguro an madagmit nga pagmonitor ngan pagresponde ha mga komunidad nga posible maapektuhan.
Usa han nanguna nga resulta han miting amo an rekomendasyon para ha pagtukod han Provincial El Niño Task Force nga mag-uurusa han mga plano ngan programa han mga ahensya para ha mas organisado nga implementasyon han mga preparedness measures ha bug-os nga probinsya.
An miting ginpangunahan ni Engr. Thomas Campomanes, hepe han PDRRMO, ngan gintambungan ni Vice Governor Maricar Sison-Goteesan sugad representante ni Governor RV Evardone.
#WeTakeAStand #OpinYon #OpinYonNews