Ginpahinumdoman han DOST-Phivolcs an katawhan han Eastern Samar mahitungod han posible nga epekto han dagko nga seismic events, samtang ginpapakusog han probinsya an mga programa ha disaster preparedness kontra ha gintatawag nga the “Big One.”
Ini nga pahayag ginhimo durante han “Prepared for the Bigger Ones” nga symposium nga gin-organisar han DOST-Phivolcs ha Melinda’s Farm & Restaurant, Borongan City dida han Hulyo 3, 2026, nga tinambongan han mga opisyal han lokal nga gobyerno, disaster risk reduction personnel, ngan mga lider han komunidad.
Sumala kan Scientist I Jeffrey S. Perez, OIC han Geologic Disaster Awareness and Preparedness Division han DOST-Phivolcs, mayda usa nga gintututukan nga seismic gap ha Philippine Trench ha butnga han Borongan ngan Guiuan nga posible magin hinungdan hin makusog nga linog ha tipaarabot nga panahon.
Ginsiring ni Perez nga tungod kay maiha na nga nakasarado ini nga bahin han trench ngan padayon nga nagtitirok hin kusog nga tectonic pressure, may posibilidad nga an paglihok hini magresulta hin daku nga linog nga posible magresulta hin tsunami nga posible umabot hin siyam ka metro ha mga baybayon nga komunidad.
Dugang pa han eksperto nga diri la an tsunami an peligro nga kinahanglan andaman, kundi pati an presensya han mga aktibo nga fault lines nga naagi ha nagkakaiba nga bahin han probinsya.
Kumo pag-andam, gin-aghat han Phivolcs an mga lokal nga gobyerno nga magpadayon ha istrikto nga pagpatuman han building safety standards, pagpatukod hin mas luwas nga evacuation ngan rescue facilities, ngan paghimo hin mga imprastraktura sugad han sea walls ngan flood gates.
Ginpabug-atan liwat an importansya han pagpanalipod han kalibungan pinaagi han pagpreserbar han mga bakhaw (mangroves) ngan coral reefs nga natural nga panalipod kontra ha epekto han tsunami ngan pagbaha.
Ha iya mensahe, ginpahayag ni Governor RV Evardone an suporta han probinsya ha padayon nga disaster preparedness initiatives ngan mga proyekto para ha mas talwas ngan mas andam nga Eastern Samar.
Ginsiring han mga opisyal nga an temprano nga pagpangandam, siyensya, ngan kooperasyon han publiko amo an magigin susi basi malikyan an epekto han posible nga dagko nga kalamidad ha tiarabot nga panahon.
#WeTakeAStand #OpinYon #OpinYonNews