CATBALOGAN CITY, Samar- Nadakop han kapulisan an usa nga high-value individual (HVI) durante han ginbuhat nga buy-bust operation ha Barangay 6 Biyernes, Abril 17.
Ginkilala an suspek pinaagi ha inisyal nga “Raj,” 37 anyos, may asawa, waray trabaho, ngan residente han Barangay Payao hini nga syudad.
Ginpatuman an operasyon han mga alas 9:39 han gab-i ipinaagi han mga operatiba han Catbalogan City Police Station Drug Enforcement Unit, kaupod an Samar Provincial Police Office ngan an Philippine Drug Enforcement Agency (PDEA) han probinsya.
Sumala han pulisya, nadakpan hi “RAJ” samtang nagbabaligya hin gin-aalgar nga shabu ngadto ha usa nga poseur-buyer.
Narekober tikang ha iya an usa nga sachet nga gintutuohan nga ginbaligya han transaksyon, ngan upat pa nga sachet nga nadiskobre ha sulod han kaha hin sigarilyo nga aada ha posesyon han suspetsado.
Sumala han otoridad, an nakumpiskar nga gin tutuuhan shabu in may kabug-aton nga 2.76 gramos, nga ginbanabana nga balor ₱18,768. Dugang pa, may narekober liwat nga gin-aaligar marijuana nga may kabug-aton nga 9.54 gramos, nga ginbabalor hin ₱2,385.
Labot han ilegal nga droga, nakuha liwat tikang ha suspek an usa nga cellphone, pitaka nga may sulod nga ₱912, usa nga ₱500 bill nga gin-gamit ha buy-bust, usa nga glass pipe nga may sulod nga gin-aalgar nga uga nga dahon hin marijuana, ngan usa nga plastik nga surudlan nga may sulod liwat nga uga nga dahon hin gintutuohan nga marijuana.
Yana, aadto na ha kustodiya han kapulisan hi “RAJ” ngan gin-aandam na an pagpasaka hin kaso kontra ha iya tungod han pagbaligya ngan pagpanag-iya hin ilegal nga droga ilarum han Republic Act 9165.
#WeTakeAStand #OpinYon #OpinYonNews