Ginturn-over han Department of the Interior and Local Government (DILG) an 50 nga bag-o nga motorsiklo para ha magkalain-lain nga police offices ha Eastern Visayas ha usa nga seremonya nga ginpangunahan ni DILG Secretary Jonvic Remulla ha Camp Sec. Ruperto K. Kangleon, Palo, Leyte.
Lima hini nga motorsiklo an nakarawat han Eastern Samar Police Provincial Office, nga direkta nga ginkarawat nira Eastern Samar Governor Ben “RV” Evardone ngan PNP Provincial Director Police Colonel Ernesto Macasil.
An mga motorsiklo kabahin han suporta han DILG ha pagpakusog han kapasidad han Philippine National Police (PNP), labi na ha pagresponde ha mga emergency ngan iba pa nga sitwasyon nga nagkikinahanglan hin madagmit nga aksyon.
Ginkikita ini nga importante nga dugang nga kagamitan para ha mga police personnel ha Eastern Samar, labi na ha mga lugar nga kinahanglan hin mas madagmit ngan mas episyente nga pagresponde ha mga panawagan han publiko.
Ha iya welcome message, gin-highlight ni Leyte Governor Jericho Petilla an padayon nga suporta han mga gobernador ha mga programa han DILG nga nagtutuyo nga mapakusog an serbisyo publiko ngan seguridad ha mga komunidad.
Ha iya mensahe, ginpahayag ni Secretary Remulla an hingyap han Unified 911 nga magin mas madagmit ngan koordinado an pagresponde ha mga emergency ha bug-os nga nasud.
“Patahimikin ang ating lugar, isa lang ang ating gawin: papayapain ang ating lugar,” siring ni Remulla.
An Unified 911 call system opisyal nga iginlunsad han Septyembre 11, 2025, sugad nga sentralisado nga sistema para ha mas paspas ngan organisado nga pagresponde ha mga emergency situation ha bug-os nga Pilipinas.
Samtang, ginpahayag liwat ni Remulla an iya pagpasidungog ngan pagdayaw ha PNP tungod han ira performance ngan pagsarig han publiko ha ahensya.
“I’m very proud of the PNP. For the first time in history, you have the highest performance ranking and one of the most trusted agencies,” mensahe ni Remulla.
Para ha Eastern Samar, an pagkarawat han lima nga motorsiklo dugang nga suporta ha mga police units ha pag-atubang han emergency calls ngan ha paghatag hin mas madagmit nga serbisyo ngan seguridad ha mga Estehanon.
Ginpapatigayon ini nga programa han DILG ngan PNP ha padayon nga paningkamot nga mapakusog an emergency response system ngan masiguro an mas episyente nga pagserbisyo ha katawhan.
#WeTakeAStand #OpinYon #OpinYonNews