Sa 161 pulis na nakatalaga sa Talipapa Station 3 na sumailalim sa testing, 82 ang nagpositibo sa Covid-19.
TINATAYANG aabot sa 82 pulis Quezon City ang nagpositibo sa Covid-19, ayon sa lokal na pamahalaan.
Nitong nakalipas na July 23, Biyernes, isinailalim sa swab tests ang mga nasabing pulis, bilang bahagi ng programa ng QC LGU sa pagsasagawa ng ”free routine testing” sa kanilang mga “frontliners” na madalas na lantad sa virus.
Ayon kay Quezon City Epidemiology and Disease Surveillance Unit (CESU) Chief Dr. Rolando Cruz, sa 161 personnel na nakatalaga sa Talipapa Station 3 na sumailalim sa test, 79 dito ang negatibo, habang ang 82 ay nagpositibo sa Covid-19.
Sinabi pa sa ulat na kabilang sa nagpositibo ang mga nakatalaga sa Police Community Precinct 1 (Unang Sigaw) at Police Community Precinct 2 (Bahay Toro).
Ang mga ito ay asymptomatic at fully vaccinated na, dagdag ni Cruz.
Sa kabila nito, sinabi naman ni QCPD Talipapa Police Station 3 Commander PLt.Col. Cristine Tabdi, na nananatili pa ring “operational” ang kanilang istasyon sa pagtanggap ng mga ulat o reklamo sa “outdoor receiving area.”
Kaugnay nito, ipinagbabawal naman ni Tabdi ang pagdalaw sa mga preso na nakakulong sa nabanggit na istasyon.
“The city government is prepared to contain the spread of the virus. Our CESU has the capability to deal with this situation. We request the public not to panic, especially the communities in which the precincts where these police personnel were assigned. We are appealing to anyone who is experiencing symptoms to please call 122 and inform CESU immediately,” pahayag naman ni Mayor Joy Belmonte.
Inutusan din ni Belmonte ang lahat ng 16 station commanders na tiyakin ang pagkakaroon ng minimum health protocols sa kanilang mga lugar. (SC)
Tags: #OpinYonMetro, #QuezonCity, #QuezonCityPoliceDistrict, #Covid19