Anim na katao ang nadakip sa sunud-sunod na operasyon ng kapulisan kontra illegal gambling sa lalawigan ng Laguna nitong April 16.
Sa Cabuyao City, isang alyas “Raymond” ang dinakip sa Barangay Banay-Banay dahil umano sa pagkakasangkot sa illegal bookies operation.
Batay sa imbestigasyon ng pulisya, nagpapanggap umano na lehitimong ahente ng small-town lottery (STL) si alyas “Raymond” ngunit natuklasan na hindi pala siya konektado sa Ramloid Corporation, ang tanging lehitimong operator ng STL sa lalawigan.
Sa bayan ng Alaminos, tatlong suspek na kinilala sa mga alyas na “Eunora,” “Mylin” at “Anabel” ang nahuli sa aktong nagto-tong-its sa Barangay Poblacion 2.
Nakumpiska mula sa mga suspek ang isang pakete ng mga baraha at P270 na bet money.
Nadakip naman sa Barangay Poblacion 3, Nagcarlan, Laguna si alyas “Romeo” at sa Barangay Daniw, Liliw, Laguna si alyas “Benedicto” dahil sa pagkakasangkot sa illegal na “bookies” operation.
Aabot sa P1,630.00 at iba’t ibang paraphernalia ang nasamsam ng mga awtoridad sa naturang mga operasyon, ayon sa Laguna Police Provincial Office.