Tatlong suspek ang naaresto habang isa pa ang pinaghahanap ng mga awtoridad matapos umanong magnakaw sa loob ng isang drugstore sa isang mall sa Cabuyao City, Laguna Martes, June 4.
Ayon sa ulat ng Cabuyao City Police Station, Martes ng tanghali nang maaktuhan ng security guard ng drugstore na kinilalang si Edjon Miaga ang dalawa sa mga suspek na pasimpleng naglalagay ng mga bote ng vitamins sa isang eco bag na may logo ng naturang drugstore.
Nang sitahin ni Miaga ang mga suspek ay dagli silang tumakas palabas ng mall at sumakay sa isang getaway vehicle na may sakay na dalawang mga kasabwat.
Sa tulong naman ng isang motorcycle rider at mga barangay tanod na humabol sa kanila ay naaresto ang tatlong suspek na kinilalang sina alyas "Jhaybie," "Pio," at "Roderick" sa loob ng isang subdivision sa Barangay Pulo.
Nakatakas naman ang isa pang kasabwat na kinilala lamang bilang si alyas "Rowena."
Narekober mula sa mga suspek ang humigit-kumulang P45,000 na halaga ng mga tinangay na mga item at ang kanilang getaway vehicle na nakarehistro sa Valenzuela City.
Nahaharap sa kasong theft ang tatlong suspek na nasa kustodiya na ng mga pulis-Cabuyao.
#WeTakeAStand #OpinYon #OpinYonNews