Boluntaryo nga nagsurender ha Tacloban City Police Office (TCPO) an duha nga ginkikilala nga suspek ha hit-and-run nga insidente nga nakasamad hin usa nga unom anyos nga bata ha Barangay San Pablo, Taft, Eastern Samar, Agosto 15, 2026.
Nahitabo an insidente pasado alas-9:50 han aga ha National Highway Paranas-Taft Road, kundiin ginsisiring nga nasagi han usa nga itom nga Yamaha NMAX 155 nga may plate number H929EI an Grade 1 pupil nga naglalakat ha daplin han kalsada.
Ginpahibaro an insidente ha Taft Municipal Police Station Taft MPS ni Barangay San Pablo Secretary Irene Canayong.
Nagpatuman dayon hin hot pursuit operation an kapulisan ha pagpanguna ni PCPT Michael Duane B. Relano, OIC han Taft MPS, ngan nakigkoordinar ha mga kasikbit nga police stations.
Nahatag han mga testigo ha kapulisan an plate number han motorsiklo, nga nagin importante nga lead ha pagkilala han tag-iya pinaagi han koordinasyon ha LTO Dolores District Office.
Nagpadayon an Taft MPS ha pag-verify hin CCTV footage, pangolekta hin impormasyon ngan follow-up operations ha Eastern ngan Western Samar tubtob nga nakilala an mga tawo nga ginkikilala nga may kalabotan ha insidente.
An mga ginkikilala nga suspek nga hira Allias JC, nga ginsisiring nga driver, ngan Allias JAM, nga ginsisiring nga back-rider, boluntaryo nga nagsurender ha TCPO pinaagi han koordinasyon ni PMAJ Shenna S. Layog, Station Commander han Police Station 2.
Ginturn-over an mga suspek ngadto ha Taft MPS para han husto nga disposisyon ngan dugang nga imbestigasyon.
Samtang, ginbubuksan han mga awtoridad an posible nga pagpasaka hin kaso ha ilarom han Article 365 han Revised Penal Code o Reckless Imprudence Resulting in Physical Injuries, ngan Article 275(2) may kalabotan ha kapakyasan ha paghatag hin bulig ha tawo nga naaksidente, depende ha resulta han imbestigasyon ngan ebalwasyon han prosecutorial authorities.
Naghatag liwat hin personal nga pinansyal nga bulig hi PCPT Relano ha pamilya han biktima ngan gindasig hira nga ipadayon an angay nga legal nga aksyon.
Nagpasalamat an Taft MPS ha mga testigo, barangay officials, CCTV owners, residente ngan iba pa nga naghatag hin impormasyon nga nakabulig ha pagkilala han mga ginkikilala nga suspek.
Padayon an imbestigasyon han kapulisan samtang gindeterminar an angay nga kaso base ha mga ebidensya ngan ha proseso han balaud.
#WeTakeAStand #OpinYon #OpinYonNews