Dalawa ang arestado matapos umanong manghablot ng cellphone mula sa isang pedestrian sa Barangay San Vicente, Biñan City, Laguna noong Martes, February 18.
Nahuli sa follow-up operation na isinagawa ng mga operatiba ng Biñan City Police Station ang dalawang suspek na kinilala lamang sa mga alyas na "Jaymark" at "Justine."
Batay sa reklamo ng biktima na kinilalang si alyas "Arvie," pasado ala-una ng madaling-araw ng Martes ay naglalakad umano siya sa kahabaan ng National Highway sa Barangay San Vicente nang biglang humarang sa kanya ang dalawang suspek na sakay ng motorsiklo.
Hinablot umano ng mga suspek ang kanyang dalang cellphone at pagkaraan noon ay tumakas papunta sa direksyon ng Barangay Santo Niño.
Kaagad namang nagsagawa ng hot pursuit operation ang mga pulis, dahilan upang maaresto ang dalawang suspek.
Nabawi mula sa kanila ang motorsiklong ginamit sa krimen at isang toy gun.
Nakadetine na sa Biñan City Police Station ang mga suspek na nahaharap sa mga kasong theft at paglabag sa Republic Act No. 10591 in relation to Omnibus Election Code.
(Ulat mula sa Regional Public Information Office, PRO 4)
#WeTakeAStand #OpinYon #OpinYonNews