Ngayong madalas na ang galaan at pasyalan sa Kapaskuhan, muling pinaalalahanan ng mga awtoridad ang publiko na siguraduhing nasa maayos na lugar ang kanilang mga sasakyan.
Ito'y matapos dalawang sasakyan ang pinagdiskitahan ng hinihinalang "Basag-Kotse Gang" sa Calamba City, Laguna nitong nakaraang Miyerkules, December 4.
Ayon sa ulat ng Calamba City police, bandang alas-nwebe ng gabi nang iulat ng mga may-ari ng nasabing sasakyan ang nasabing insidente, na naganap sa harap ng isang gusali sa Bucal Bypass Road, Barangay Lamesa ng nasabing lungsod.
Sa paunang imbestigasyon ng mga awtoridad, isang saksi na kinilala lamang sa alyas "Gabriel" ang naglalakad sa gilid ng kalsada nang makakita siya ng bubog sa bangketa.
Nang siyasatin niya ang naturang lugar ay doon niya nadiskubreng may nagbasag sa mga bintana ng dalawang kotseng nakaparada sa kalsada.
Isang Nissan Navarra pickup at isang Toyota Vios ang parehong nagtamo ng basag sa mga bintana nito.
Ayon naman sa mga may-ari ng naturang mga sasakyan, wala namang mahahalagang bagay na tinangay mula sa mga sasakyan.
Tinitingnan na ng mga awtoridad ang CCTV footage sa naturang lugar upang makilala ang mga posibleng salarin, gayundin ang motibo sa nasabing krimen.
(Ulat mula sa Regional Public Information Office, PRO 4)
#WeTakeAStand #OpinYon #OpinYonNews