Duha nga gin-aalegar miyembro han Communist Terrorist Group (CTG) an patay samtang narekober an mga armas katapos han usa nga enkwentro ha kabukiran han Barangay Caulayanan, Motiong, Samar han Abril 24.
Sumala ha 8th Infantry Division, pinaagi han 46th Infantry Battalion han Philippine Army, nagkaada hin pito ka minutos nga bakbakan kontra han mga nahibilin nga miyembro han Yakal Platoon nga sakop han Eastern Visayas Regional Party Committee (EVRPC).
Katapos han enkwentro, narekober han mga tropa han gobyerno an usa nga M14 rifle ngan usa nga kalibre .45 nga pistola, upod an duha nga bangkay han mga rebelde nga ginbilin han ira mga kaupod samtang nagpalagiw.
Ginsiring han 8th Infantry Division nga ini nga insidente usa na liwat nga daku nga kadaogan kontra han CTG nga nag-ooperate ha Eastern Visayas. Dugang pa nira, nagpapakita ini nga padayon nga naghuhuyang an grupo tungod han padayon nga presensya ngan operasyon han militar ha rehiyon.
Sumala pa han dibisyon, an sunod-sunod nga enkwentro nagpapakita nga napipiritan na la an CTG nga mag-engage hin diri klaro ngan madaliay nga mga bakbakan samtang nagkukuri hira pagmintinar han ira organisasyon.
Gindugang liwat han militar nga an pagbilin han ira mga kaupod nga namatay nagpapakita han kakulangan han pagtagad han grupo ha kinabuhi han ira mga miyembro.
Samtang padayon an operasyon militar ha lugar basi matiktikan an iba pa nga nagpalagiw nga miyembro han CTG, gin-aghat gihapon han 8th Infantry Division an nahibilin nga mga rebelde nga magsurender ngan magpahimulos han Enhanced Comprehensive Local Integration Program (E-CLIP) han gobyerno, nga nagtatagana hin bulig ngan oportunidad basi makabalik hira ha malinawon ngan produktibo nga panginabuhi.
#WeTakeAStand #OpinYon #OpinYonNews