Nadakpan han kapulisan an duha nga gin-aaligar nga nagbabaligya hin ilegal nga droga ha usa nga buy-bust operation nga ginbuhat han kaagahon han Mayo 2 ha Barangay Bolusao, Lawaan, Eastern Samar.
An operasyon ginpatuman han Eastern Samar Police Provincial Drug Enforcement Unit kaupod an Lawaan Municipal Police Station, kun diin nadakpan hira alyas Willie ngan alyas Felimon, nga pareho na ha legal nga pangidaron.
Nakuha han mga operatiba an upat nga sachet han gin-aaligar nga shabu ngan an buy-bust money nga ginamit ha transaksyon.
Sumala han kapulisan, ginpahiilarom ha drug test an duha didto ha Regional Forensic Unit 8 ha Palo, Leyte ngan nagpositibo ini.
Yana, aada na ha kustodiya han Lawaan Municipal Police Station an mga suspetsado ngan ginpapreparar na an mga kaso kontra ha ira ha ilarom han Republic Act No. 9165 o Comprehensive Dangerous Drugs Act of 2002.
(Van Basilia)
#WeTakeAStand #OpinYon #OpinYonNews