Arestado an duha nga gintutuohan nga drug personalities ha usa nga buy-bust operation nga ginpatuman han Eastern Samar Police Provincial Office (ESPPO) upod an Borongan City Police Station ha Barangay Surok, Borongan City han kulop han Mayo 19.
Ginkilala an mga suspek pinaagi han ira mga alyas nga “Pitong,” 49 anyos, ngan “Lily,” 47 anyos, nga pareho residente han Barangay Songco, Borongan City.
Sumala ha report han kapulisan, nadakop an duha samtang aktuwal nga nagbabaligya hin gintutuohan nga shabu ngadto ha poseur buyer han mga otoridad.
Narekober tikang ha ira posesyon an tulo nga sachet nga may sulod hini gintutuohan nga shabu, usa nga minarkahan nga ₱1,000 buy-bust money, ₱505 nga cash nga gintutuohan nga halin ha ilegal nga transaksyon, usa nga sundang, pitaka nga may identification cards, ngan usa nga pula nga CT150 nga motorsiklo.
Ginpahayag han ESPPO nga an ngatanan nga narekober nga ebidensya ginmarkahan ngan gin-inventory dayon ha lugar han operasyon ha atubangan han mga testigo para ha husto nga dokumentasyon ngan pagpreserbar han ebidensya.
An mga suspek yana aada na ha kustodiya han Borongan City Police Station ngan andam na pasakahan hin kaso may kalabutan ha pagtalapas han Republic Act 9165 o an Comprehensive Dangerous Drugs Act of 2002.
An operasyon kabahin han padayon nga kampanya han kapulisan kontra ilegal nga druga ngan kriminalidad ha probinsya han Eastern Samar.
(Van Basilia,)
#WeTakeAStand #OpinYon #OpinYonNews