Malaking kabawasan sa pasanin ng mga health volunteer sa Quezon City ang pagpasa ng isang ordinansa na nagbibigay ng daily allowance sa mga nagsisilbi sa mga Covid-19 vaccination site sa naturang lungsod.
APRUBADO na kay Quezon City Mayor Joy Belmonte ang isang ordinansa na magkakaloob ng daily allowance na hanggang P2,500 para sa mga volunteer health workers sa vaccination sites sa lungsod.
“It is only right and just that we give them a daily allowance so they won’t be spending their personal funds for transportation and food, for example,” pahayag ng alkalde.
Ani Belmonte, malaking tulong na ang serbisyong binibigay ng mga health worker sa lungsod lalo na’t kulang sila sa mga medical staff gaya ng mga doktor at nars .
Nabatid sa ulat sa ilalim ng Ordinance No. SP-3024 s., 2021 (An Ordinance Granting Daily Allowance to the COVID-19 Vaccination Volunteer Medical Staff), ang QC LGU ang magbabayad para sa pagkain, transportasyon, at iba pang pangangailangan ng mga volunteer medical staff na nagseserbisyo sa mga Covid-19 vaccination sites sa lungsod.
"Starting June 1, anyone who will sign up as a volunteer will be remunerated per day based on the following categories: P2,500 for medical doctors, P1,400 for dentists and nurses, P1,300 for post-graduate interns, P1,000 for other allied medical professionals, and P800 for midwives," nakasaad pa sa ordinansa.
Ang nasabing ordinansa ay inihain nina Councilors Franz Pumaren, Eric Medina, Jun Ferrer, Donny Matias, at Lala Sotto-Antonio.(SC)
Tags: #OpinYonMetro, #QuezonCity, #Covid19vaccine, #dailyallowance